ບົດຄັດຫຍໍ້
ຈຸດປະສົງຂອງການສຶກສາຄັ້ງນີ້ ແມ່ນເພື່ອປະເມີນຄວາມເຂັ້ມຂຸ້ນຂອງທາດກຳມັນຕະລັງສີ 232Th , 226Ra ແລະ 40K ທີ່ມີໃນດິນເຂດພູຈອມວອຍ ປ່າສະຫງວນແຂວງບໍລິຄຳໄຊ ເພື່ອປະກອບເປັນຂໍ້ມູນພື້ນຖານດ້ານກຳມັນຕະພາບລັງສີໃຫ້ແກ່ ສປປ ລາວ ແລະ ພາກພື້ນ. ຕົວຢ່າງດິນໄດ້ຖືກເກັບແມ່ນບໍລິເວນພູຈອມວອຍ ເຊິ່ງມີທັງໝົດ 28 ຈຸດ ແລະ ມີ 66 ຕົວຢ່າງ ເຊິ່ງໄດ້ວັດແທກ ແລະ ວິເຄາະຫາປະມານກຳມັນຕະພາບລັງສີໃນຕົວຢ່າງດິນ ໂດຍນໍາໃຊ້ຫົວວັດແທກ Germanium ບໍລິສຸດ (HePGe, Model: GEM20P4-70). ຄ່າສະເລ່ຍຄວາມເຂັ້ມຂຸ້ນຂອງທາດ 226Ra, 232Th ແລະ 40K ມີຄ່າເທົ່າ 71.04±17.74 Bq kg-1, 106.28±27.45 Bq kg-1 ແລະ 835.69±211.21 Bq kg-1 ຕາມລຳດັບ. ຄ່າສະເລ່ຍຂອງກຳມັນຕະພາບລັງສີເຣດຽມທຽບເທົ່າ (Raeq), ປະລິມານລັງສີທີ່ດູດກືນໃນອາກາດ (DR), ອັດຕາປະລິມານລັງສີທີ່ໄດ້ຮັບຕໍ່ປີ (AED), ດັດສະນີຄວາມສ່ຽງລັງສີຈາກພາຍນອກ (Hex) ແລະ ພາຍໃນ (Hin) ມີຄ່າ 211.53±61.72, 131.86±27.82 , 0.16±0.03, 0.78±0.17 ແລະ 0.97±0.21, ຕາມລຳດັບ. ນິວໄຄດ໌ລັງສີ 238U, 232Th ແລະ 40K ທັງໝົດທຸກຈຸດທີ່ວັດແທກໄດ້ແມ່ນສູງກວ່າຄ່າສະເລ່ຍຄ່າສະເລ່ຍກຳມັນຕະພາບລັງສີສະເພາະຂອງນິວໄຄດ໌ລັງສີທຳມະຊາດໃນດິນຂອງສາກົນ, ອັດຕາປະລິມານປະລິມານລັງສີດູດກືນໃນອາກາດ (DR), ອັດຕາປະລິມານລັງສີທີ່ໄດ້ຮັບພາຍນອກຮ່າງກາຍປະຈຳປີ (AEDout) ແມ່ນສູງກວ່າຄ່າສາກົນ , ສວ່ນກຳມັນຕະພາບລັງສີເຣດຽມທຽບເທົ່າ (Raeq), ຄ່າປະລິມານລັງສີທີ່ໄດ້ຮັບຈາກພາຍນອກຮ່າງກາຍປະຈຳປີ (external hazard index: Hex) ແລະ (internal hazard index: Hin) ແມ່ນຕ່ຳກວ່າຄ່າຂອງສາກົນ, ລາຍງານໂດຍ (UNSCEAR ໃນປີ 2000).